a16:3Apo 18:2
b16:13Mak 15:21
c16:161Ko 16:20; 1Pi 5:14
d16:17Mat 7:15; Tit 3:10
e16:18Pil 3:19; 2Pi 2:3
f16:19Rom 1:8; 1Ko 14:20
g16:20Tav 3:15
h16:21Apo 16:1-2, 19:22, 20:4
i16:23Apo 19:22; 1Ko 1:14
j16:25Rom 1:5; Ep 1:9, 3:5, 9; Kol 1:26

Romans 16

Paulo Musovanu Aso Laixe Mulai Noxi'a ta Mitema Tavu'alo

1Eni emasaxa lexe ngingi nga'oxonu laixe noxie vivinge Vipi. Ane sema ne utotomu la ixaxai sou isu'ulinu lalotu no nano no tuala tila ne Senikilia. 2La sou lexe ane ilai ixali noxinge, la eni emasaxa lexe ngano'e ine'e ngongi'a ngaxolu loxo nenge nenge'a noxou Tila, mo ngasexelaxe no anu 'ilixo noxinge nenge ta mitema noxou Lataua. Mo lexe tu'umaxu vile noxie, la ngingi ngasu'uline, xo ane misu'usu'uline'i ta mitema tavu'alo mo misu'ulileli kalumo.

 3 aEni emasaxa lexe ngasovanu aso laixe noxilo ulai noxie Pilisila xe mulue Akuila. Ane'i ta menexilo e nexi noxi'a texaxai tepita no anu xaixai noxou Kalisito Iesu. 4Ane'i ilou misu'ulileli laixe, xe ta mitema i'oxo lexe ive'axu su'uli ne, la ane'i ilou i'ume uasi. La sou eni amasaxa lexe alemolu laixe noxi'a ilou, ia enisisi uasi, ane'i ta temanu lalotu no tuatuala noxi'a ta mitema ane ane'i ta Iutaia uasi ne, opone'i kalumo aloxo ne. 5Mo ngasovanu aso laixe noxilo ulai noxi'a ta temanu lalotu e ilavusou ipita no tani noxi'a ilou kalumo. Mo ngasovanu aso laixe noxilo kalumo ulai noxou vivilo e Epainetusi e eni emasaxau musuku. Anu anusisi muxiunu maulixu mo mumuxaxu tanu noxou Kalisito tei noxi'a ta mitema mukalusi no xalee lia tila ne Asia. 6Mo ngasovanu aso laixe tatila noxilo ulai noxie Malia kalumo. Xo ane mi'oxonu xaixai tatila manina sou misu'ulingengi. 7Mo ngasovanu aso laixe noxilo ulai noxi'a Anitolonikusi ilou Iuniasi kalumo. Ta tulaleli ta tamei ne nexi noxi'a tekei texolu no nano no taasou navunavu. Ane'i ilou ualaisi'a muuliuli noxi'a ta mitema sou xaixai noxou Lataua. Mo ane'i ilou mimuxaxu tane'i noxou Kalisito tei noxilo. 8Mo ngasovanu aso laixe noxilo ulai noxou Amipiliatusi anu menexilo no anu 'ilixo noxou Kalisito. 9Mo ngasovanu aso laixe noxilo ulai noxou Ulivanusi anu nenge menexinge no anu xaixai noxou Kalisito. Mo ngasovanu aso laixe noxilo kalumo ulai noxou Sitakisi anu menexilo eni emasaxau manina. 10Mo ngasovanu aso laixe noxilo ulai noxou Apelisi kalumo. Anu itema vile e ta mitema ilemolu lexe anu itema sou umulimulinu Kalisito laixe. Mo ngasovanu aso laixe noxilo ulai noxi'a Alisitovulusi ilo'a ane'i ane ixoxolu no tani noxou. 11Mo ngasovanu aso laixe noxilo ulai noxou tulaleli Elotioni, mo ngasovanu aso laixe noxilo ulai noxi'a ane'i ane ixoxolu no tani noxou Nasisusi kalumo. Ane'i ta mitema noxou Tila. 12Mo ngasovanu aso laixe noxilo ulai noxi'a Tilipina ilee Tiliposa, ane'i ta sema ta tamei ilavusou ixaxai xavine'i manina no anu xaixai noxou Tila. Mo ngasovanu aso laixe noxilo ulai noxie Pesisi, ane sema vile ilavusou ixaxai xaviine no anu xaixai noxou Tila kalumo. 13 bMo ngasovanu aso laixe noxilo ulai noxou Luvusi, anu itema laixe no anu xaixai noxou Tila, mo ulai noxie nenu, e ane loxo nenilo kalumo. 14Mo ngasovanu aso laixe noxilo ulai noxou Asinikilitusi mo Pelexoni mo Elemesi mo Patalovaisi mo Elemasi, xe ulai noxi'a ta vivilo e ane'i ilo'a ixoxolu. 15Mo ngasovanu aso laixe noxilo ulai noxou Piloloxusi mo Iulia mo Neliusi ilee vimou mo Olinipasi xe ta mitema noxou Lataua e ane'i ilo'a ixoxolu ipita ne. 16 cMo ta temanu lalotu noxou Kalisito lai 'o misovanu aso laixe kalumo ulai noxinge. Mo ngingi ukalusi ne ngasexelangenge ngatongato'o no anu 'ilixo noxinge nenge ta mitema noxou Lataua.

 17 dIoxe, eni peletoto pekia'u noxilo ulai noxinge ta vivilo ne aloxo 'o, ngalaxa'ingengi laixe noxi'a ta mitema se'i no taingengi. Ane'i maasi la ipupuiou vaikala e ngingi ngeno'u ne, la ixalixu mamulo xe valavala. La sou ngaxolu va'axu noxi'a ta mitema aloxo ne. 18 eXo ta mitema ane i'oxo'oxonu 'ili'ilixo aloxo ne, ilavusou i'oxonu xaixai noxou Tila noxinge Kalisito uasi, ane'i ilavusou imulinu masaxa no anu vasime'asi. Mo ane'i ilavusou i'oxonu vaikala soxu e lailaixe manina, mo i'oxonu vaikala tu'atu'axu la i'oxonu loloxa'a ane'i ane ilavu laixe malaxo uasi. 19 fXo ngingi ngalavusou ngamulimulinu vaikala noxou Lataua laixe, la a'alosinge muiaveiave mulai no tuatuala mukalu mo ta mitema milomusou, la mu'oxoleli eni e'osa manina noxinge. Ia eni emasaxa lexe ngingi ngalavu laixe no anu 'ilixo laixe xe 'ilixo masua la nga'ume no anu. 20 gMo anu voxo 'alaisi sou Lataua opo se'isisi u'oxongengi ngataxapalisou Satani uxolu no laangenge. Alauna noxou Tila noxinge Iesu uxolu noxinge.

 21 hEni tangaxo Timoti e noxou texaxai tepita musovanu aso laixe ulai noxinge kalumo. Mo ta tulaleli Lukiosi mo Iasoni xe Sosipatele, ane'i kalumo misovanu aso laixe ulai noxinge. 22Mo eni Tetiusi e ekaukavunu vaivaikala noxou Paulo 'o, esovanu aso laixe ulai noxinge kalumo no nano no anu ualasou Tila. 23 iMo Xaiosi kalumo musovanu aso laixe ulai noxinge. Anu itema ne eni axoxolu no taasou, nexi noxi'a ta temanu lalotu mukalusi. Mo Elasito, anu itema sou usaxila'u lamoli noxou kisou tuala tila ne xe vivinge Kuatosi, ane'i ilou kalumo misovanu aso laixe ulai noxinge. 24Alauna noxou Tila noxinge Iesu Kalisito uxolu noxinge ukalusi utotomu. Manina.

 25 jIoxe, nenge ta'itinu Lataua ualasou, xo Anusisi mumomomo sou u'oxongengi ngatulu pekia'inge, mo ngamuxaxu tangengi manina no anu a'alo laixe sou Iesu Kalisito e eni ea'alomengixu. Xo vaikala ne mutalume tatei ia vaimomo 'o ne a muxali lamana ne. 26Mo vaimomo 'o ne anu mulamana avile, mo no anu vaivaikala noxi'a ta mitema sou palomatana e mikaukavunu ne, sou Lataua e kaluxu uasi ne mivikalanexi lexe nexi talai taa'aloi'a ta mitema no anu vaivaikala noxi'a ne. Mo sou ta mitema no tuatuala ukalusi ilavusou xe ilamana, la imuxaxu tane'i noxou Lataua xe imulinu 'ili'ilixo e Anu umasaxau. 27Manina misevile, Lataua laixe Anusisi lavulavu noxou mutila manina. La sou laixe lexe nenge taxolu mo tanenge umulinu mimii ta tatila e Anu mu'oxonu no avolu Iesu Kalisito ne. Lexe nenge tanenge umulinu laixe, la nenge ta'itinu Lataua ualasou utotomu mo kaluxu uasi. Manina.
Copyright information for ATA